Ocon misugyot makolekta sa daling panahon basura sa kamerkadohan


Gisugyot ni konsehal Zaldy Ocon, chairman sa komite sa environment and natural resources, ngadto sa kadagkoan sa IPM nga ilang hatagan og prioridad ang pagkolekta sa basura sa mga merkado sa syudad.


Kini ang pamahayag ni Ocon atol sa hiniusang tigom sa komite sa environment ni konsehal Ocon ug komite sa panglawas ni konsehal Malou Gaane.


Matud sa konsehal nga ang mga merkado maoy matag adlaw nga dangpanan sa katawhan alang sa panginahanglanon sa panimalay busa kanunay unya kining hinlo aron malikay ang mga mamagligyaay ug mamalitay sa mga sakit.


Lakip sa gisugyot ni Ocon ang pagdugang sa ilang garbage trucks ug garbage collectors aron ma-akomodar ang tanang dapit sa syudad sa pagkolekta sa basura matag adlaw.


Niini nga pamaagi maminusan na ang reklamo sa katawhan kalabot sa mga wala makolektang basura.

Gipasabot ni Ocon nga sila nga mga opisyal sa syudad maoy malosdokan sa mulo sa katawhan sa panahon nga adunay basura nga dili makolekta.


Samtang gipadangat sa IPM ngadto sa komite nga nagdugang na sila og garbage trucks ingon man mga garbage collectors aron mapalapdan ang ilang serbisyo. Gani, halos nahurot na nila og kolekta ang basura nga nabilin sa Bagyong Vinta.


Nunot niini, gikalipay ni Ocon ang maong kalambuan ug malaumon nga wala nay reklamo ang moabot kanila tungod sa pag-improbar sa maong serbisyo. (El Kapitan)