Goking miawhag sa mga negosyante pag-renew sa ilang business permits

Hugot nga nanawagan si konsehal George Goking, chairman sa komite sa trade and commerce, sa mga negosyante nga mag-renew sa ilang mga business permits samtang layo pa ang deadline.

Segun sa balaod, ang deadline sa pag-file sa renewal sa business permits taman lang sa umaabot Enero 20, 2018.

Atong likayan nga magdasok kita sa panahon nga deadline na ug lihokon ang renewal sa mga lisensya samtang sayo pa, dugang ni Goking.

Niini, siya malipayong mipahibalo nga ang kagamhanan sa dakbayan padayong nangita sa mga pamaagi nga mapasayon ang pag-transact dinha sa City Hall.

Lakip niini mao ang paggamit sa online billing and payment system sa kagamhanan pinaagi sa website sa dakbayan nga www.cagayandeoro.gov.ph gikan sa alas 7 sa buntag hangtod sa alas 7 sa gabii.

Atong likayan nga molapas sa Enero 20, 2018 ang pagbayad aron malikayan ang multa nga gipahamtang nga 25 porsyento nga surcharge ug 2 porsyento nga penalty, pamahayag ni konsehal Goking.