Oro district hospital dihas Lumbia sugdan na pagtukod

Gipaabot sugdan sa Enero sunod tuig ang pagtukod sa usa ka satellite hospital dinhi sa dakbayan sa Cagayan de Oro.


Kini human gipahigayon sa milabayng adlaw ang groundbreaking ceremony sa pagatukurong tulo ka andanang primary hospital dinha sa barangay lumbia.


Sa maong kalihokan, si bise mayor Kikang Uy mipaabot sa iyang dakong panghinaut nga mahatagan sa dugang kaarangan ang kinabuhi sa katawhan dili lang sa mga barangay sa bukid bukid nga bahin kun dili lakip na sa mga munisipyo nga kasikbit sa dakbayan sa aminahang bahin.

Niini, si konsehal Malou Gaane, chairman sa komite sa panglawas ug usa sa mga nangusog nga matukuran og hospital ang Lumbia, mibutyag nga sa pagsugod sa operasyon sa hospital, aduna kiniy 25-bed capacity.


Taliwala nga magsugod kini sa 25-bed capacity, atong paningkamotan nga mahitsas kini sa tanang ekipo aron dili na maglisod ang katawhan duol sa dapit sa pagpatambal ilabina panahon sa emerhensiya, dugang ni Gaane.

Nasayran nga ang pagtukod sa balor P50 milyones nga hospital sugdan sa umaabot Enero ug gilantaw nga magsugod sa operasyon sa tuig 2019.

Ang kalihokan nga gipangulohan ni mayor Oscar Moreno gitambongan usab ni konsehal Reuben Daba uban sa kadagkoan sa City Health Department, Department of Health, Philhealth, City Engineering, mga opisyal sa barangay Lumbia ug Tuburan.