3 agri projects mapatuman na

Mapatuman na sa daling panahon ang tulo ka proyekto sa agrikultura dinhi sa dakbayan sa Cagayan de Oro.

Kini human ang konseho sa syudad sa milabayng sesyon nga gidumala bise mayor Kikang Uy mipalabang sa managlahing ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa rehiyonal nga buhatan sa Department of Agriculture (DA) alang sa pagpatuman sa nahisgotang tulo ka mga proyekto.

Kini naglakip sa pagpatuman sa Techno-Demo on Sustainable Corn production in Sloping Areas (SCoPSA) project dinha sa barangay Tagpangi.

Ang proyekto gilantaw nga magpalambo sa industriya sa produksyon sa mais sa maong barangay.

Lakip sa giuyonan sa konseho nga mapatuman dinhi sa syudad mao ang programa sa departamento pagpalambo sa industriya sa cassava. Ang DA gipaabot nga motunol pabor sa kagamhanan sa dakbayan sa usa ka unit nga cassava chipper balor P124 mil ug usa ka unit nga cassava granulator balor P118 mil.

Ang tulo ka managlahing ordinansa nga gipalabang sa konseho alang sa maong katuyuan gipaluyohan sa komite sa agrikultura ni konsehal Annie Daba ug komite sa pamalaod ni konsehal Ian Mark Nacaya.