Gan miaksyon sa mulo sa mga hamtong

Gitakdang dapiton sa komite sa senior citizens ni konsehal Leon Gan ang mga tag-iya ug tigdumala sa mga restaurant ug parmasya nga nagnegosyo dinhi sa syudad.

Kini aron sa pagpahinumdum kanila kabahin sa gihatag nga pribilihiyo sa balaod alang sa mga hamtong natong kaigsoonan.

Matod ni Gan nga nakadawat siya og reklamo gikan sa pipila ka mga hamtong nga adunay mga restaurant ug parmasya dinhi sa syudad ang dili mohatag og diskwento nga tataw kining nakasupak sa balaod.

Gipasabot ni Gan nga kun adunay mapatud-an niini, posibleng mag-atubang og kaso. Gipaboran usab ni konsehal George Goking ang plano ni Gan diin matud pa ni Goking lakip siya nakadawat gihapon sa susamang mulo.

Lakip sa dapiton sa komite pagtambong sa gitakdang tigom mao ang kadagkoan sa Cagayan de Oro Water District (COWD) ug Cagayan de Oro Electric Power and Light Company (Cepalco) nga susamang gireklamo sa pipila ka mga hamtong.

Nanghinaut si Gan nga angay unta masabtan sa mga magpapatigayon ang gihatag nga pribilihiyo ngadto sa mga hamtong. (El Kapitan)