Salcedo nangusog mamugna Cooperative Dev’t Affairs Ofc

Si konsehal Enrico Salcedo, chairman sa komite sa cooperative, padayong nangusog nga mamugna ang Office of Cooperative Development Affairs (OCDA) dinhi sa syudad.


Sa miaging tigom sa iyang komite, gituki ang mga probisyon sa sugyot ordinansa alang sa maong katuyuan.

Niini, gisugyot nga ang OCDA mao ang modumala ug mo-operate sa Cooperative Development and Management Division nga maoy tahasan pag-initiate ug pagpatuman sa mga programa alang sa pagpromote ug pagpalambo sa kooperatiba.


Sa susamang paagi ang OCDA mao usab ang mo-assist sa pag-develop sa plano ug mga stratehiya kalabot sa integration sa cooperative principles ug methodology sa mga programa ug proyekto, morekomendar sa standards ug mga giya.


Nasayran nga dinhi sa syudad, adunay 206 ka mga kooperatiba nga rehistrado ug adunay permit. Si konsehal Salcedo mibutyag nga nakita sa iyang komite nga kinahanglan matukod ang OCDA aron maoy motutok sa development programs sa mga kooperatiba sa syudad ilabina nga usa sa gitinguha ni Mayor Oscar Moreno nga mahiusa ang livelihood programs sa syudad pinaagi sa kooperatiba.


Niini, gimugna ang adhoc committee nga panguluhan ni Mansueto Dela Peña, chair sa Regional Cooperative Development Council aron pag-consolidate sa tanang rekomendasyon sa mga probisyon sa gisugyot nga ordinansa. (Yonggals)