Nadya miawhag masusi bag-ong Sanitary Landfill dihas Pagalungan

Nabalaka si konsehal Nadya Emano-Elipe sa taho gikan sa media ug sa mga opisyal sa barangay San Simon nga iyang nahinabi sa kahimtang sa Sanitary Landfill diha sa barangay Pagalungan.

Sa sesyon sa konseho niadtong Lunes nga gidumala ni bise mayor Kikang Uy, si Nadya mipadayag sa gikatahong adunay gapanglutaw nga mga basura paingon sa suba ilabina panahon nga kusog ang ulan ug matod pa, ang leakage delikado sa panglawas sa katawhan sa dapit.

Sa iyang special report giawhag sa konsehal nga kinahanglan ipasabot sa mga kawani sa CLENRO ang kahimtang sa Landfill sa labing dali nga panahon tungod kay adunay mga molopyo sa dapit nga giingong apektado sa maong leakage.

Ang atong prioridad dinhi mao man ang panglawas sa katawhan ug ang ilang kapanginabuhian busa kinahanglan kining masolosyonan, pamahayag ni Nadya.

Niini gihangyo sa konsehal ang konseho nga mohimo og mga lakang mintras sayo pa ang tanan.

Sa iyang bahin, si konsehal Edna Marban-Dahino, vice chairman sa komite sa environment, mibutyag sa resulta sa gipahigayong pagsusi sa dapit kalabot na sa gikatahong leakage.

Matod niya nga aktwal niyang nakita ang kahimtang sa water waste nga sa panahon sa kusog nga ulan moapaw kini ug agi sa usa ka kanal ug sapa mopaingon kini sa dakong suba nga maagian na ang mga barangay San Simon ug uban pang kasikbit nga barangay.

Sa panahon sa pagsusi si konsehal Dahino mipakoha og sample sa water waste aron masuta ang tinuod nga kahimtang.

Niini, ang konseho sa panguna sa komite sa panglawas ni konsehal Malou Gaane gitakda nga magtigom ugmang adlawa aron pagtuki sa gikatahong leakage ug pagpangita sa angayang solusyon ug tukmang aksyon. (El Kapitan with reports from APD