Salcedo midayeg, mipasalamat sa suporta sa tanang Kagay-anon pagsaulog sa Kalag-kalag

Si konsehal Enrico Salcedo, chairman sa komite sa cooperative sa konseho, hugot nga midayeg ug mipasalamat sa tanang mitabang nga mamintinar ang kahusay ug kalinaw sa mga sementeryo ingon man diha sa mga kadalanan.

Kini human iyang nakita nga malinawon ang pagsaulog sa kalag kalag tungod sa suporta sa kwerpo kapolisan, mga sakop sa Roads and Traffic Administration, mga civic organization ingon man mga opisyal sa kabarangayan nga adunay mga sementeryo.

Matod ni Salcedo nga mahinungdanon kayo ang suporta sa tanan aron magmalinawon ug malikayan ang mga dautang panghitabo sulod ug gawas sa mga sementeryao ma pampubliko man o pribado.

Dugang ni Salcedo nga gani diha sa Barangay Gusa hapsay ang dagan sa trapiko tungod kay anaa ang pagtinabangay sa tanang sektor sa katilingban ug sa kinatibuk-an malinawon ang pagsaulog sa kalag kalag.

Dili kini mahimo sa usa lang kun dili pinaagi gayud sa pagtinabangay ug paghiusa sa tanan, pamahayag ni konsehal Salcedo.(Yonggals)