Gaane motuon sa aplikasyon sa K-Plus maakredit isip LSB sa CdeO

Ang komite sa panglawas sa konseho ubos ni konsehal Malou Gaane, gipaabot nga motuki sa aplikasyon sa Kagay-an Plus Reserving Life, Uniting Society Inc. alang sa akredistasyon isip sakop sa Local Special Bodies (LSB) sa kagamhanan sa dakbayan.

Nasayran nga ang kapunungan natukod niadtong pang 2005 ug rehistrado sa Securities and Exchange Commission (SEC) diin ang tumong mao ang pag-establisar og organisasyon ilabina sa mga LGBT community aron maprotektahan ang ilang mga katungod lakip na niadtong mga nahikawan sa mga batakang serbisyo.

Tumong usab niini nga ma-promote ang adbokasiya sa organisasyon dinha sa pagpahigayon og mga prevention activities sama sa Sexually Transmitted Infection, Human Immunodeficiency Virus (HIV) ug Acquired Immune Deficiency Syndrome (AIDS) ug uban pa.

Gilantaw usab sa maong kapunungan nga mahimong leading organization nga magpalapad sa kampanya nga walay mapihig nga nilalang taliwala sa gipili niini nga gender aron masolusyonan ang sexual health ug human rights issues sa mga PLHIVs ug mga LGBT.

Sayu pa, giduso sa City Planning and Development Office ang aplikasyon sa kapunungan human nila nakita nga nakasunod sa tanang mga administrative requirements isip Civil Society Organization nga ma-ila sa kagamhanan. (Yonggals)