Konseho nangusog masolosyonan problema sa panubig sa dakbayan

Gipasalig sa kadagkoan sa Rio Verde, ang nag-supply og

tubig ngadto sa Cagayan de Oro Water District (COWD) nga ilang ibalik ang normal nga supply sa tubig sa westeng bahin sa syudad sulod sa tulo ka adlaw.

Kini human gidapit sa komite sa public utilities ni konsehal Bong Lao ang kadagkoan sa Rio Verde ug Water District atol sa tigom sa milabayng adlaw aron mahatagan sa katin-awan ang problema sa kakulangon sa panubig nga nasinati sa kinabag-ong konsumedor sa westeng bahin sa syudad.

Mahinumduman nga sa regular sesyon sa konseho niadtong Lunes nga gidumala ni bise mayor Kikang Uy, si konsehal Bong Lao mitaho sa daghang reklamo sa mga molupyo sa dakbayan nga labihang nahasol sa pagkawala sa tubig nga supply sa Water District.

Ang representante sa Rio Verde mipasabot nga adunay gipahigayon nga pagtul-id sa main pipeline nga magkonektar ngadto sa COWD maong adunay nahitabong paghinay ngadto sa pagkawala sa tubig labina sa mga taas taas nga bahin sama sa Lumbia, Iponan ug uban pang kasikbit nga mga barangay.

Dugang pa, giingon nga naapektohan ang linya sa panubig tungod sa nahitabong linog dili palang dugay hinungdan nga nagpadayon sa kasamtangan ang pagtul-id ug gani gipasalig niini nga mahuman kini sulod lang sa tulo ka adlaw.

Sa ilang bahin, ang taga-COWD mipasabot nga kinahanglan nga kusog gayud ang pressure sa tubig aron nga makaabot kini sa mga taas nga dapit hinungdan sila malaumon matibawas kini sa maong concessionare.

Sila si konsehal Lao nanghinaut nga mahibalik gayud sa normal ang supply sa tubig sa westeng bahin sa syudad aron masolusyonan ang kakulangon sa tubig nga gikinahanglan sa katawhan.(Yonggals)