Eco-Solidwaste Mgmt Law sa Brgy Patag mapatuman

Hayan mapatuman na sa hingpit sa konseho sa barangay Patag ang balaod nga naglatid sa Ecological Solidwaste Management kon RA 9003.

Kini human hiniusang giuyonan sa konseho sa syudad ubos ni bise mayor Kikang Uy ang gisumeteng Ordinance No. 001-13, 2017 sa barangay alang sa pagpatuman.

Ang barangay mipahibalo sa ilang mga molopyo nga gikinahanglang mabahin bahin ngadto sa malata, dili malata ug mapuslan pa ang mga basura tungod kay dili kolektahon sa mga basurero ang nagsagol pang mga basura.

Ang ordinansa sa barangay nagpahamtang og multa ngadto sa mga makalapas sa probisyon niini. Lakip sa gilatid nga multa mao ang P100 alang sa unang kalapasan, P150, P200 ug P300 sa ikaduha, ikatulo ug sunod pang mga kalapasan o’ community service sulod sa walo ka oras.

Ang resolosyon nga gisagop sa konseho alang sa maong katuyoan gipaluyohan sa komite sa barangay affairs ni konsehal Alam Lim ug komite sa pamalaod ni konsehal Ian Mark Nacaya.