Calizo nangusog mahatagan og tukmang seguridad mga subdivision sa dakbayan

Padayon karong gipanday sa komite sa police, fire and public safety sa konseho ni konsehal Romeo Calizo ang sugyot ordinansa nga mag-provide sa security protocols sa tanang subdivision dinhi sa dakbayan sa Cagayan de Oro.

Tumong sa maong sugyot nga mahatagan sa igong kapasiguroan ang mga molopyo sa mga subdivision.

Sa tigom sa komite kagahapon diha sa hawanan sa konseho, si Calizo mibutyag nga kinahanglan nga mapalabang ang maong ordinansa aron mapahamtang ang multa ug silot ngadto sa mga makalapas sa probisyon sa gisugyot nga balaod.

Kini human nakita sa konsehal nga walay insakto nga protocol nga mahimong i-convert ngadto sa usa ka ordinansa ang matag subdivision dinhi sa dakbayan.

Siya midugang nga sa kasamtangan walay uniform protocol nga gisunod ang mga subdivision diha sa mga lagda ug reglamento nga gisitar sa kapolisan nga angayan untang sundon sa mga gwardiya sa subdivision.

Niini, gisugyot ni Calizo ngadto sa mga security officers sa tanang subdivision ang pagsumite sa ilang mga sugyot ug internal rules aron magsilbing giya diha sa pagpanday sa maong sugyot ordinansa.