P1.2M gigahin alang sa mandatory drug testing sa taga-City Hall

Mobalor sa P1.2 milyones ang gigahin nga pundo sa konseho sa syudad ubos ni bise mayor Kikang Uy alang sa hingpit nga pagpatuman sa Mandatory Drug Test sa tanang opisyal ug kawani sa City Hall.

Kini human hiniusang giuyonan sa konseho sa sesyon niadtong Lunes ang ordinansa alang sa maong katuyuan nunot sa gipalabang nga balaod nga naglatid alang sa pag-promote og drug-free workplace dinhi sa dakbayan sa Cagayan de Oro pinaagi sa pagpahigayon sa maong mandatory drug test.

Sa sesyon, si konsehal Romeo Calizo, chairman sa komite sa police, fire and public safety ug Cagayan de Oro Anti Drug Abuse Council, mipadayag sa iyang kalipay nga mapatuman na gayud sa hingpit ang maong lakang.

Iyang gitin-aw nga medyo nalangan ang maong lakang tungod sa duha ka mga importanteng butang. Una ang opinion sa City Legal Office nga legal ang pagpahigayon sa maong drug test sa mga opisyal ug ang pundo nga gikinahanglan sa pagpalit sa medical kits ug bayad sa laboratory sa nasangpit nga katuyuan.

Samtang giklaro usab ni Calizo nga ang buhatan sa Civil Service Commission ug usab pinasubay sa probisyon sa Local Government Code adunay silot alang sa mag-positibo sa paggamit sa illegal nga druga.

Ang pundo sa maong proyekto kuhaon gikan sa Continuing Appropriation CY 2015 General Services -Aid to Narcom -Philippine Drug Enforcement Agency (PDEA) aron magamit sa maong katuyuan.

Ang mga ordinansa nga gipalabang sa konseho gipangamahanan nila ni konsehal Edna Dahino ug Romeo Calizo. (El Kapitan)