Ocon nangusog dalan diha sa Consolacion, brgy 21

Naglaum ang duha ka barangay nga maangkon na sa syudad ang sumpay nga lote ug matibawas na ang koneksyon sa dalan nga gibuksan sa syudad diha sa Baculio Street - Manuel Vega sa Barangay Consolacion nga magkonektar sa dalan sa Barangay 21, ning syudad.

Kini human ang komite sa public works ni konsehal Zaldy Ocon nagdapit sa sunod tigom sa komite sa tag-iya sa lote nga maagian sa nasangpit nga proyekto alang sa negosasyon.

Matod ni Ocon nga gikinahanglan sa komite ang tabang ug kooperasyon sa mga kapitanes ilabina ang pagdeterminar sa mga apektadong pamilya nga maigo sa maong proyekto aron sila mapahilona sa dakbayan.

Apan, gipahayag ni barangay kagawad Alberto Laude sa Consolacion, atol sa tigom, nga gamay na lang nga pamilya ang maapektahan niini.

Samtang si Kapitan Gilda Go sa Barangay 21 mibutyag nga makatabang og pagaan sa trapiko sa syudad kun kini nga proyekto matibawas kay ang gikan ug mopaingon sa Pier pwede nang makaagi paggawas sa barangay Consolacion.

Nunot niini, gihangyo ni Ocon ang duha ka barangay opisyal sa ilang kooperasyon tungod ug alang sa katawhan sa dakbayan. (El Kapitan)