Updated: Jun 22
PABORABLENG giuyonan sa konseho sa syudad atol sa sesyon niadtong Lunes nga gidumala ni Bise Mayor Bebot Rodriguez ang Resolution No. 005-2026 sa Sangguniang Kabataan sa Barangay 22.
Kini may kalabutan sa ilang 2026 SK Annual Budget nga mokabat sa P640 mil kapin gikan sa Enero ngadto sa Disyembre ning tuig.
Lakip sa ilang gigahinan mao ang programa sa edukasyon, panglawas, kinaiyahan, peace building and security, social inclusion and equity, active citizenship ug economic empowerment.
Ang maong budget miagi makuting pagtuon ug deliberasyon sa mga hintundang komite ug nasuta nga mahimo na kining ipatuman sa labing dali nga panahon alang sa kaayuhan sa kabatan-onan.
Ang resolusyon nga gisagop sa konseho alang sa maong katuyoan gipaluyohan sa komite sa youth and sports development ni Konsehal Kenneth John Sacala ug komite sa pamalaod ug reglamento ubos ni konsehal Edgar Cabanlas. (JRG/SP)
Updated: Jun 26
DUGANG kalamboan ang matagamtaman sa mga lumulopyo sa Barangay Canitoan, ning syudad.
Kini human ang Konseho sa Syudad sa sesyon sa Lunes nga gidumala ni Bise Mayor Rodriguez misagop sa resolusyon nga nag-aprobar sa ordinansa sa barangay kalabot sa ilang Annual Budget nga mobalor og P 52,122,577.00 subay usab sa rekomendasyon sa buhatan sa City Budget.
Gigahin sa barangay ang pundo balor og P10,426,535.00 alang sa pagpalit og 1 unit backhoe, pagtukod sa home care unit, materials recovery facility, pathway, pagrehabitar sa ilang Health Center, fire station, barangay outpost, pag-instalar og CCTV cameras ug traffic lights sa dapit.
Gipundohan usab sa barangay ang programa alang senior citizen, gender and gevelopment, pagpangandam sa kalamidad, pagproteher sa kinaiyahan, Barangay Disaster Risk Reduction and Management Fund, pagtunol og benepisyo sa mga kawani, maintenance expenses lakip na sa training, mga gamit ug himan sa opisina ug uban pang operating expenses.
Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug sa komite sa pamalaod ug reglamento ni Konsehal Edgar Cabanlas. (RNQ/SP)
GIKLARO ni Konsehal Eric Salcedo, chairman sa komite sa environment, nga andam ang gobyerno local sa pagtabang sa mga small-scale manual quarry operators sa pagpahigayon og desiltation sa suba diha sa barangay Consolacion kay makatabang kini nga malikayan ang pagbaha apan kinahanglan mosubay kini sa insaktong proceso segun sa gisitar sa balaod sa syudad.
Kini ang gipasabot ni konsehal Salcedo atol sa tigom sa komite subay sa hangyo sa Consolacion Cagayan de Oro Small Quarries Association nga mahatagan sila og Special Permit sa syudad alang sa ilang matag adlaw nga panginabuhian sa ilang mga pamilya.
Subay niini, gihangyo ni Salcedo si Ms. Hannah Mejorada, Presidente sa maong asosasyon, sa pagsumite sa tanang gikinahanglang rekisitos ug sa pagsunod sa balaod alang sa maong matang sa operasyon. (MLR/SP)
