GILANTAW nga masolusyonan na ang mga pagbaha diha sa Barangay 32 ning syudad.
Kini human ang konseho sa sesyon Lunes nga gidumala ni Bise Mayor Bebot Rodriguez hiniusang misagop sa resolusyon nga nag-aprobar sa Barangay Resolution No. 2026-371 nga may kalabutan sa ilang 2026 Annual Budget nga adunay gibana-banang kinitaan ug galastohon balor P5,188,519.
Lakip sa gihatagan sa prayoridad ubos sa maong budget ang pag rehabilitar sa ilang drainage ug paghinlo sa mga kanal.
Migahin usab ang barangay og igong pundo alang sa pagrehabilitar sa Material Recovery Facility, pagtukod og suga sa kadalanan ug pag-fabricate sa 3 ka units nga boundary signages.
Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Edgar Cabanlas. (JRG/SP)
DAKO og makatabang sa panginahanglanon sa transportasyon sa katawhan alang sa usa ka progresibo nga syudad ang pagbutang sa dugang satellite transport terminal sa pipila ka bahin sa atong syudad.
Kini ang unod sa special report ni Konsehal Roger Abaday, chairman sa komite sa public order and safety, atol sa sesyon niadtong Lunes nga gidumala ni Bise Mayor Bebot Rodriguez.
Gisugyot ni Abaday ang pagbutang og satellite transport terminal diha sa Barangay Lumbia nga maoy moserbisyo sa katawhan sa uptown nga bahin sa syudad ug sa hinterland barangay, samtang diha ipahimutang sa Barangay Puerto ang maong satellite terminal alang sa este nga bahin sa Dakbayan.
Si Abaday midugang nga adunay pipila ka magpapatigayon ang nag-operate niini sama sa Magnum Express apan kulang gihapon sa panginahanglanon sa mga sumasakay ilabi na sa malamboon nga syudad.
Niini nagtoo si Abaday nga dako kini og makatabang nga makunhoran ang kasamtangan giatubang nga problema sa trapik sa syudad ug matubag ang panginahanglanon sa katawhan.
Nunot niini malaumon si Abaday nga matun-an kini sa mga hintungdan komite sa konseho lakip sa pag-abag sa ubang opisina sa goberno tungod ug alang sa kalamboan ug sa umaabot pa nga henerasyon.
Ang nasangpit nga taho ni Konsehal Roger Abaday giduso ni Bise Mayor Bebot Rodriguez ngadto sa komite sa public utilities ni Konsehal Eric Salcedo, sa komite sa panalapi ni Konsehal Yan Lam Lim, komite sa economic enterprises ni Konsehal Edgar Cabanlas ug sa komite sa planning, research and innovation ni Konsehal Jonjon Rodriguez. (MLR/SP)
“ANG solusyon sa kakulang sa transportasyon dili lang bahin sa terminal kun dili kinahanglan adunay episyente nga sistema sa pampublikong transportasyon sa Siyudad”.
Kini ang gibutyag ni Konsehal Edgar Cabanlas, majority floor leader, agig reaksyon sa taho ni Konsehal Roger Abaday sa sesyon niadtong Lunes nga gidumala ni Bise Mayor Bebot Rodriguez kabahin sa pagpahigayon og komprehensibong pagtuon sa pagtukod og dugang off-street o satellite transport terminal sa siyudad.
Matod ni Cabanlas nga dili angay tugotan ang pagbutang sa mga terminal sulod sa siyudad, kay problema na pud ang ka-traffic ug aron atong mamentinar nga dili kita makalapas sa orihinal nga katuyoan sa siyudad nga ang westbound taman ra gyud sa Bulua ug ang eastbound taman ra sa Agora.
Gibutyag usab ni Cabanlas nga ang pagbuhat sa off-street terminal dili lang trabaho sa goberno, trabaho pud ni sa mga pribado kay pwede man ang mga pribadong negosyante magbutang gamit ang ilang mga pribadong luna.
Pero wala ko kahibalo kung unsaon nato pag-synchronize nga dili makalapas sa orihinal nga katuyoan, sumpay niya.
Gisugyot ug nagtoo si Konsehal Cabanlas nga mas maayo nga ipadayon ang anaa na sa kasamtangan sa stage planning sa buhatan sa National Economic Development Authority (NEDA) ang giplanong Bus Rapid Transport System ug ang pagpatuman sa Land Transportation Route Plan sa Siyudad.
“Efficient, affordable transport system ang makasulbad sa problema sa kakulang sa sakyanan sa Siyudad,” panapos ni Cabanlas. (RNQ/SP)
