XU midonar og loteng magamit nga reloc site sa CDO

DUGANG relocation ug resettlement site ang matukod dinhi sa dakbayan sa Cagayan de Oro.

Kini ang gibutyag ni Bise Mayor Kikang Uy human giuyonan sa konseho sa sesyon niadtong Lunes ang ordinansa nga naghatag og katungod ni Mayor Oscar Moreno pagpirma sa Deed of Donation tali sa Xavier University alang sa kapin sa 29 ka hektaryang luna dinha sa gipanag-iyahang lote sa barangay Bugo ug Puerto.

Sa kasabutan, ang loteng gidonar gamiton lang sa dakbayan alang sa relokasyon sa mga informal settlers ilabina ang mga informal settlers nga kasamtangang nanimuyo sa dapit.

Niini, ang konseho naghatag usab og katungod sa mayor pagpirma sa Memorandum of Agreement (MoA) tali sa Xavier University alang sa pagpatuman sa proyekto.

Sa maong MoA, ang dakbayan gitahasan sa pagseguro nga mapadali ang pagproseso sa mga permit alang sa pagtukod sa mga balay, pag-instalar og sistema sa panubig ug kuryente ug uban pang gikinahanglang panugot alang sa hingpit nga relokasyon sa mga benepisaryo.

Malaumon ang bise mayor nga mahatagan na sa kalinaw sa ilang pagpamuyo ang kasamtangang mga okupante sa El Gaucho Property sa Xavier University human sa pagpirma sa gikinahanglang Deed of Donation ug MoA.