Xavier Science Foundation, mibisita kang Konsehal Rodriguez

MAINITONG gidawat ni Konsehal Jonjon Rodriguez, chairman sa committee on planning, research, innovation, and people’s organization accreditation ug miyembro sa City Council for the Protection of Children (CCPC), ang Xavier Science Foundation (XSF) atol sa ilang pagbisita sa iyang opisina.

Ang XSF usa ka non-government organization nga gitukod ni Fr. William Masterson, SJ, gipangulohan ni Executive Director Roel Ravanera, uban nila Deputy Director Thieza Verdijo ug Program Manager Sheila De Lima.

Atol sa maong miting gipresentar sa XSF ang kasaysayan ug mga programa sa organisasyon, lakip na ang Early Childhood Care and Development (ECCD) Project nga nakigtambayayong sa City Health Office.

Pinaagi sa maong proyekto, gisuportahan ang 625 ka bata nga naka-enrol pinaagi sa community ug home-based setup, diin adunay ayuda sama sa bugas nga gihatag sa ilang mga pamilya.

Gipahibalo usab sa XSF ang ilang mga umaabot nga kalihukan, lakip ang breastfeeding event karong Agosto 26, 2025 sa DeLuxe Hotel alang sa 200 ka lactating mothers, ug ang Breastfeeding Forum sa Setyembre 2, 2025 sa Barangay Dansolihon, nga pagatambongan sa mga inahan gikan sa mga hinterland barangays sama sa Tinagpoloan, Mambuaya ug Bayanga.

Subay niini, mipadayag si Konsehal Rodriguez sa iyang hugot nga suporta sa XSF ug sa mga programa niini alang sa kaayohan sa mga kabataan ug sa komunidad sa dakbayan. (JDO/SP)