Waste water treatment facility diha sa Cogon Public Market gikalipay ni Goking

SI Konsehal George Christopher Goking, chairman sa komite sa trade og commerce hugot nga mipasalamat ni Mayor Klarex Uy sa padayon nga pagpaningkamot aron masiguro nga ang kamerkadohan sa dakbayan magpabiling limpyo, luwas, ug maayong lugar alang sa tanan.

Kini human misaksi ang konsehal sa gipahigayon nga ceremonial turn-over sa miaging adlaw sa waste water treatment facility dihas Cogon Public Market, ning syudad sa pag-abag ni Environmental Management Bureau Regional Director Reynaldo S. Digamo, Acting City Economic Enterprises and Business Development Administration (CEEBDA) Manager, Atty. Marianne Ragas, CEEBDA chairman Konsehal Edgar Cabanlas ug uban pang sakop sa konseho sa dakbayan.

Matod ni Goking nga ang maong proyekto usa ka dakong lakang sa pagpreserbar sa natural nga kahinguhaan sa pagpadayon sa kalimpyo sa merkado, diin ang hugaw nga tubig sa merkado miagi sa maayong nga pagtratar sa dili pa ipagawas ngadto sa drainage.

Nagpamatuod lamang kini nga ang administrasyon ni Mayor Uy nagsunod sa mga balaod sa kinaiyahan sa nasud subay sa RA 9275, The Philippine Clean Water Act of 2004, nga nagmando nga ang mga establisemento sama sa merkado, publikong edipisyo, ospital, ug commercial centers gikinahanglan nga adunay sewage treatment o konektado sa sewerage system.

Kini nga proyekto gitumong sa pagpanalipod sa kinaiyahan, sa panglawas sa katawhan, malungtarong kalamboan ug mas lig-on nga siyudad alang sa tanan. (RNQ/SP)