VM Bebot midayeg sa paningkamot sa Camp Evangelista Movants HOA

GIDAYEG ni Bise Mayor Bebot Rodriguez ang Camp Evangelista Movants Homeowners Association atol sa groundbreaking ceremony sa ilang housing project sa Barangay Baikingon.

“Ako kamong gidayeg sa inyong panaghiusa ug determinasyon nga maabot ninyo kining kalamposan,” matod ni VM Bebot, nga mitambong aron ipaabot ang suporta sa lokal nga kagamhanan sa maong housing project.

Ang mga miyembro sa asosasyon mao ang mga pamilya nga naapektuhan sa demolisyon sulod sa Camp Evangelista sa Patag niadtong Hunyo 18, 2024, diin mokabat sa 591 ka mga panimalay ang naapektuhan.

Bisan pa sa mga hagit, nagpadayon ang organisadong paningkamot sa asosasyon ubos sa pagpanguna ni Ms. Raquel Ramonal ug uban pang mga lider ug miyembro aron makabaton og kaugalingong puy-anan.

Gipasabot usab sa bise mayor nga ang kalamposan sa proyekto resulta sa panaghiusa sa komunidad ug sa kooperasyon sa nagkalain-laing sektor nga mitabang sa pag-proseso sa maong housing project.

Lakip sa mitabang sa maong paningkamot mao ang opisina ni Bise Mayor Bebot Rodriguez, nga naghatag og pinansyal nga suporta alang sa groundbreaking ceremony ug nagtabang sa pagpasayon sa koordinasyon sa lain-laing ahensya, sama sa Department of Human Settlements and Urban Development (DHSUD), National Housing Authority (NHA), Department of Environment and Natural Resources (DENR), ug sa Committee on Subdivision, Housing Development and Landed Estate nga gipangulohan ni Konsehal Edgar Cabanlas.  (SPE/SP)