TWG gitahasan pagrepaso sa regulasyon sa analog, digital weighing scales

GITAHASAN sa komite sa trade and commerce ni Konsehal George Christopher Goking ang Technical Working Group (TWG) ubos sa pagpanguna sa buhatan sa Department of Trade and Industry (DTI) sa pagtigom aron tan-awon pag-usab ang mga balaod ug regulasyon bahin sa paggamit sa digital ug analog nga timbangan sulod sa kamerkadohan ug ubang establisemento sa syudad.

Kini human hiniusang nagtigom ang komite sa trade and commerce ni Konsehal Goking uban sa economic enterprises ni Konsehal Edgar Cabanlas, ug consumer protection ni Konsehal Jonjon Rodriguez, diin gituki ang panawagan ni Konsehal Goking sa paghatag sa klaro ug patas nga pagpamaligya ug pagpanalipod sa mga konsumedor.

Buot ni Konsehal Goking nga ang mga isyu ug reklamo bahin sa mga timbangan mahatagan sa pagtagad ug kini na ang panahon nga ma-revisit ang maong balaod.

Matod pa nga daghang konsumedor nga mas gipili pa nila magpalit didto sa mga groceries kay segurado ang balor sa ilang gipamalit.

Niini hugot nga gihangyo ni  Konsehal Goking ngadto sa TWG nga matun-an  o maapil ang tanang opinyon o rekomendasyon gikan sa mga hintungdang representante ug sa pagsumite sa daling panahon sa final draft sa maong sugyot ordinansa.

Ang maong tigom gitambongan usab nila ni Konsehal Aga Suan, Marlo Tabac, ug Imee Moreno. (RNQ/SP)