Trisikad ordinance sa Lumbia tun-an sa Brgy Affairs

HATAGAN og pagtagad sa komite sa Barangay Affairs ni Konsehal Yan Lam Lim ang gidusong ordinansa sa konseho sa Barangay Lumbia.

Kini naglatid alang sa pletihan sa mga nagbiyahiang tricycle for hire ingon man sa operasyon sa Tri-Cab for hire sa barangay.

Gipasabot nga subay sa Cagayan de Oro Traffic Code ang barangay ang maghatag sa taripa sa pletihan sa mga trisikad ug kun pila ka unit ang angayang mag-operate.

Sa ordinansa nga gipalabang sa barangay giingon nga kini ang usa sa labing malamboon nga sub-urban hinterland barangay nga adunay 29 ka sitio ug kapin 30 ka subdibisyon.

Dinhi usab nahimutang ang City Sports Complex, Cagayan de Oro City Hospital-Lumbia, Bureau of Jail Management and Penology (BJMP)-Regional Office 10 ug 15th Strike Airwings sa Philippine Air Force.

Dugang pa, tulo ka tunghaan sa elementarya ug usa ka kumpletong High School (junior-senior) ang natukod sulod sa barangay nga adunay kapin sa 4 mil ka tinun-an.

Gipasabot nga gikinahanglan ang insaktong ruta ug facilidad sa transportasyon nga magsilbi dili lamang sa katawhan sa barangay kun dili lakip na sa kasikbit nga mga dapit. (SP/RNQuiblat)