Sustainable livelihood program mapatuman sa CDO

DUGANG kaarangan ang gipaabot nga maangkon sa pipila ka mga Kagay-anon.

Kini human giuyonan sa Konseho sa syudad ubos ni Bise Mayor Kikang Uy ang ordinansa nga naghatag og katungod ni Mayor Oscar Moreno pagpirma sa Specific Implementation Agreement (SIA) tali sa Department of Social Welfare and Development (DSWD) alang sa pagpatuman sa Sustainable Livelihood Program (SLP).

Nasayran nga ang kasabutan magpalapad sa program sa kapanginabuhian sa gobyerno ilabina na sa Livelihood Assistance Grants (LAG), PADAYON, SLP, Zero Hunger PCB Projects, SLP Projects –Mainstreaming, EO No. 70 Projects ug Balik Probinsya, Bagong Pag-asa program.

Ubos niini, ang rehiyonal nga buhatan sa DSWD magtunol sa gikinahanglang pundo alang sa livelihood assistance ngadto sa mga natumbok nga benepisaryo sa programa ug maghan-ay sa palisiya ug patakaran sa pagpatuman sa mga angayang proseso.

Samtang ang dakbayan sa Cagayan de Oro moabag sa DSWD sa pagpatuman sa programa ug motunol sa gikinahanglang administrative ug logistical support ingon man sa pagkuha sa kooperasyon sa mga barangay.

Niini, si Konsehal Girlie Balaba, chairman sa komite sa social services, malaumon nga pinaagi sa programa maseguro nga mapadayon ug molahutay ang ipatumang mga proyekto aron maalibyohan ang kapobrehon ug mahatagan sa kaarangan ang kinabuhi sa katawhan.