Sugyot pagtukod og Poultry Dressing Plant tukion sa komite ni Pascual

KONSIDERAHON sa komite sa Agriculture sa konseho ni Konsehal Jay Roa Pascual ang gisugyot nga pagtukod og “Triple A” Poultry Dressing Plant diha sa Sitio Inayao, Barangay Pagalungan, ning syudad.

Si Konsehal Pascual mibutyag nga ang maong proyekto kolaborasyon sa kagamhanan sa dakbayan ug sa Department of Agriculture (DA).

Pinaagi niini dako kini nga ikatabang sa paghatag og malungtaron nga oportunidad sa panginabuhian sa katawhan sa dakbayan, pamahayag ni konsehal Pascual.

Sa gipadangat nga sulat ni OIC-City Veterinarian Dr. Lucien Anthony Acac giingon nga ang maong facilidad usa ka maayong tinubdan sa trabaho ug makapalambo sa ekonomiya ingon man negosyo dili lamang diha sa barangay lakip na ang mga kasikbit nga dapit.

Niini, si Konsehal Pascual gipaabot nga mopatawag og tigom uban sa kadagkoan sa mga hintundang departamento sa syudad aron makuha ang mga tukmang rekomendasyon alang sa maong katuyoan.