Sugyot pagpahamtang og garbage fees, ubnp sa mga kooperatiba gitun-an

Giduso ngadto sa Community Improvement Division (CID) sa buhatan sa mayor ang sugyot nga pagpahamtang og regulatory fees alang sa mga kooperatiba nga namugna ug adunay operasyon dinhi sa dakbayan sa Cagayan de Oro.

Kini human ang komite sa kooperatiba ni Konsehal Imee Rose Moreno nagtigom sa milabayng semana og mituki sa gisugyot nga balaodnon.

Sa tigom, gipasabot sa kadagkoan sa CID nga ang maong balaodnon dili magpahamtang og buhis ngadto sa mga kooperatiba kun dili mga regulatory fees lang sama sa garbage fees.

Mahinumduman nga subay sa BLGF MC 31-2009, ang mga kooperatiba nga adunay transaksyon gikinahanglang molukat og mayor’s permit ug mobayad sa regulation, inspection ug surveillance sa operasyon sa patigayon nga dili molabaw sa P1 ka libo. Dugang pa, ang matag kooperatiba kinahanglan usab nga mobayad sa Community Tax Certificate ug basic tax nga P500 isip usa ka juridical entity.

Niini, si Moreno malaumon nga sa ipalabang nga mga lakang mahatagan sa dugang kalamboan ang operasyon sa mga kooperatiba sa dakbayan.

Ang unang tigom sa komite gitambongan usab ni Konsehal Yvy Emano.