Sugyot kausaban pagtunol og cash awards sa mga atleta tun-an sa LFC

Giduso ngadto sa Local Finance committee ang sugyot pag-amendar sa ordinansa nga naghatag og cash awards sa mga Kagay-anong atleta nga makakuha og ganti sa mga kompetisyon, national ug international.

Kini human nagtigom ang komite sa sports and youth development ni Konsehal John Michael Seno og miduso sa maong lakang ngadto sa LFC alang sa makuting pagtuon.

Sa maong tigom , gihangyo ni Seno ang Commission sa City Sports nga maghatag og komentaryo ilabina kabahin sa dula sa boxing aron makab-ot ang makiangayon nga cash incentives sa mga atleta sa ubang kompetisyon.

Ang lakang pag-amendar sa ordinansa paborableng gisuportahan nila ni Konsehal Aga Suan og Yvy Emano human nasayran nga 20 na katuig ang milabay gikan sa pagpalabang niini ug misugyot nga unta malakip ang mga coaches sa gitanyag nga mga insintibo. Ang tigom sa komite gitambongan nila ni Konsehal Aga Suan og Yvy Emano.