top of page

Suan misuporta sa proyekto pagtukod og satellite offices sa Oro Rescue


Maayong lakang ang pagmugna og satellite offices sa CDRRMD ug Oro Rescue 911 diha sa barangay Lumbia ug Agusan.

Mao kini ang mapahayag ni Konsehal Aga Suan atol sa milabayng tigom sa komite sa climate change adaptation and mitigation and disaster risk reduction ni Konsehal John Michael Seno human gipresentar sa Technical Working Group (TWG) nga gipangunahan sa buhatan sa CDRRMD ni Nick Jabagat ang structural plan alang sa duha ka andanang satellite offices uban sa sugyot ordinansa ug mga gikinahanglang rekomendasyon alang sa pagpatuman sa proyekto.

Matod ni Suan nga paspas kaayo ang paglambo sa syudad ug nag-anam usab kahuot ang dagan sa trapiko busa angayan nang matagaan sa igong solosyon ang daling pagresponde sa tanang matang sa emerhensya diha sa kadalanan.

Niini, hugot ang suporta ni Suan sa sugyot ordinansa ug naglaum nga mapalabang kini sa daling panahon sa tinguha nga mapangandaman sa kagamhanan ang gikinahanglang pundo sa pagpatuman sa proyekto. (RNQuiblat/SP)

bottom of page