Social Services komite motuki sa gilarawng 2 PopDev programs

HISGUTAN sa komite sa social services ni Konsehal Girlie Balaba ang gisugyot nga dugang proyekto nga magpalapad sa Population and Development (PopDev) Programs.

Kini human ang buhatan sa Community Improvement Division (CID) misumete sa plano ug banabana sa gahin ngadto sa Konseho sa syudad ubos ni Bise Mayor Bebot Rodriguez alang sa pagpatuman sa dugang mga programa sa tinguha nga matunol ang epektibo ug efficienteng serbisyo ngadto sa katawhan.

Ang plano naglakip sa paggahin og kapin sa P2.22 milyones alang sa Adolescent Health and Development (AHD) Program nga gitumong pag-abag sa kabatan-onan nga malikayan ang sayo ug balik balik nga pagmabdos ug uban pang delikadong mga kalihokan.

Matod pa nga taliwala sa kakulangon sa pundo, naangkon gihapon sa dakbayan ang Healthy Pilipinas Awards for Healthy Communities 2022 Priority Area 6 on Sexual and Reproductive Health.

Lakip sa gihangyong mapundohan mao ang Population and Development Integration balor P2.5 milyones.

Ang programa gitinguha sa pagkuha sa data sa population aron mahimong basihan sa pagplano, pag-umol og mga palisiya ug pagtunol sa angayang serbisyo ngadto sa katawhan.

Niini, si Balaba nagdapit nila ni city administrator Atty. Roy Hilario Raagas, city legal officer Atty. Kenneth Tamala, POPCOM-10 regional director Neil Aldrin Omega, CIDOIC Marisa Tagarda, city DILG director Engr. Jane Docallos, city budget officer Atty. Percy Salazar, city accountant Atty. Beda Joy Elot, acting city planning and development officer Ramir Balquin ug city treasurer Jasmin Maagad pagtambong sa tigom ugmang adlawa, Mierkoles sa alas 2 sa hapon dinha sa hawanan sa konseho.