top of page

Social pension sa mga kabus nga PWDs matunol na

Hayan makadawat na og social pension sugod sa sunod tuig 2024 ang mga kabus nga Kagay-anong adunay kabilinggan sa panglawas kon Persons with Disabilities (PWDs).


Kini human giuyonan sa Konseho sa Syudad ubos ni Bise Mayor Bebot Rodriguez ang ordinansa nga nagtunol sa social pension ngadto sa mga kabus nga PWDs ug pasiunang naggahin og P15 milyones alang sa maong katuyuan.

Si Konsehal Girlie Balaba, Chairman sa Komite sa Social Services ug nangamahan sa ordinansa, mibutyag sa namatikdang pagpanginahanglan sa mga Kagay-anong adunay kabilinggan dili lang sa panglawas kun dili lakip sa ilang mental health.


“Atong kaakuhan ang pagpatuman sa mga pamaagi nga maalibyohan ang kahimtang sa kinabuhi sa katawhan ug ang pagtunol sa pasiunang tag-P500 nga social pension. Bisan gamay lang, makatabang na,” pasabot ni Balaba.


Hinuon, ang ordinansa naglatid sa pagtunol sa pension balor P500 matag bulan o’ 20% sa city poverty threshold estimate kun unsa ang taas aron maabagan ang inadlaw adlaw nga kapanginabuhian sa mga kabus nga PWDs sa syudad.


Nasayran nga adunay kapin sa dos mil ka mga nalistang Kagay-anon nga PWDs nga anaa ubos sa poverty threshold ug gilantawng modawat sa maong social pension sugod sunod tuig.


Niini, si Bise Mayor Bebot Rodriguez malaumon nga sa pag-abot sa panahon mausbawan ang maong tag-P500 nga binulang social pension tungod kay matod niya nag-anam usab og saka ang presyo sa mga palaliton ilabina ang gikinahanglang tambal ug medisina.


Ang ordinansa nga gipalabang sa konseho alang sa maong katuyuan gipangamahanan usab nila ni Konsehal Ian Mark Nacaya, Roger Abaday, Jay pascual, Imee Rose Moreno, Romeo Calizo, George Goking, Malou Gaane, Edgar Cabanlas, Suzette Magtajas-Daba, Alam Lim, ug John Michael Seno.

Commentaires


bottom of page