SK Annual Budget sa Balubal giuyonan sa konseho

MAPATUMAN na sa hingpit sa Sangguniang Kabataan sa Barangay Balubal ang ilang mga programa ug proyekto alang karong tuiga.

Kini human ang Konseho sa syudad ubos ni Bise Mayor Bebot Rodriguez, sa sesyon niadtong Lunes, misagop sa resolusyon nga nag-uli sa resolusyon sa barangay diin nasukip ang 2022 SK Annual Budget nga adunay gibanabanang kinitaan ug galastohon balor P1,061,465.00.

Gihatagan sa prioridad sa SK sa barangay nga mapatuman karong tuiga ang pagpalit og mga gamit alang sa programa sa paugnat sa kusog ug pagtukod og konkretong mga bangko diha sa dulaanan sa barangay.

Lakip sa gipundohan sa SK mao ang pagpalit og usa ka unit nga laptop, usa ka unit nga digital camera ug usa ka unit nga printer.

Dugang gipundohan mao ang programa paghatag og dugang kahibalo sa kabatan-onan sa natad sa panglawas, kampanya kontra druga, pagproteher sa kinaiyahan ug mga programa nga mag-umol sa capability building ug leadership sa mga sakop sa SK ug uban pang proyekto nga makapadasig kanila diha sa pagkab-ot sa dugang kaarangan ug kalamboan sa ilang kinabuhi.

Ang resolusyon nga gisagop sa konseho alang sa maong katuyuan gipaluyohan sa komite sa Sports and Youth Development ni Konsehal John Michael Seno ug komite sa pamalaod ni Konsehal Ian Mark Nacaya.