𝐒𝐢𝐬𝐭𝐞𝐫 𝐜𝐢𝐭𝐲 𝐫𝐞𝐥𝐚𝐭𝐢𝐨𝐧 𝐭𝐚𝐥𝐢 𝐬𝐚 𝐂𝐃𝐎, 𝐃𝐚𝐯𝐚𝐨 𝐠𝐢𝐥𝐚𝐧𝐭𝐚𝐰

Gilantaw sa Konseho sa Syudad ubos ni Bise Mayor Bebot Rodriguez nga mahimong sister city sa Cagayan de Oro ang dakbayan sa Davao aron mapalambo ang ekonomiya ug masagop ang ilang mga stratehiya nga gipatuman.

Gibutyag ni Konsehal Suzette Magtajas-Daba, chairman sa Komite sa Sister City, nga gusto niyang isagop dinhi sa syudad ang ilang mga pamaagi sa pagdumala sa nagkadaiyang programa nga nakahatag og kaayuhan sa kinabuhi sa katawhan.

Malaumon si Konsehal Daba nga gawas nga daghan og matun-an ang Dakbayan sa ilang mga pamaagi, aduna usay makutlo ang Davao nga mga programa nga ilang mapatuman.

Niini, ang resolosyon nga nagpadayag sa ilang tinguha nga maumol ang maong relasyon sa duha ka dakbayan gipaluyuhan usab sa Komite sa Pamalaod ni Konsehal Edgar Cabanlas.