Serbisyo alang sa tanan: Go nagpahibalo sa expanded centenarian awarding sa Hulyo 25

SI Konsehal Gilda O. Go, chairperson sa komitiba sa senior citizens, nakigkita bag-ohay pa lamang sa mga lider sa nagkalain-laing grupo sa senior citizens, lakip na ang Office of Senior Citizens Affairs (OSCA), United Senior Citizens Chapter CDO, Inc. (UNISCA), ug Cagayan de Oro City Federation of Senior Citizens Assn. Inc. (CAFESCA), aron hisgutan ang mga isyu nga naglangkob sa ilang kahimtang ug palig-onon ang panagtinabangay sa mga gingsakpan niini.

Atol sa miting, si Konsehal Gigi Go mipasalig sa paghatag og serbisyo nga walay pagpili, apil ang katigulangan, aron masiguro nga walay senior nga mabiyaan.

Nunot niini, nagpahibalo si Konsehal Gigi Go sa tanang senior citizens ug ilang mga pamilya sa pagpahigayon sa 3rd Batch sa Expanded Centenarian Awarding and Cash Gift Distribution karong Hulyo 25, 2025 (Biyernes), alas 10:00 sa buntag hangtod alas 3:00 sa hapon diha sa City Tourism Hall.

Kini nga seremonya usa ka espesyal nga kalihokan alang sa mga senior citizens nga nag edad 80, 85, 90, 95, ug 100 nga kwalipikado sa Expanded Centenarian Program.

Gipahinumdoman usab kadtong wala pa malakip sa listahan sa paghulat sa opisyal nga pahibalo alang sa sunod nga payout schedule.

Giaghat ang mga benepisyaryo sa pagdala sa ilang OSCA ID ug photocopy niini.

Ang kalihokan pasiugdahan sa National Commission of Senior Citizens (NCSC), City Social Welfare and Development Office (CSWD), ug sa Office for Senior Citizens Affairs (OSCA) uban ang suporta ni Mayor Rolando “Klarex” A. Uy.

Para sa dugang kasayuran, kontaka ang OSCA/CSWD sa mosunod nga numero: OSCA Office, Brgy. 40 (duol sa City Health Office) 0915-5451-800 / 0997-8877-845.

“Isip inyong konsehala, buot kong ipadayag ang akong pagpasidungog, pagpasalamat, ug tinuoray nga gugma alang sa atong mga pinalanggang tinahud nga Senior Citizens,”

panapos ni Konsehal Go. (JAO/SP)