Seno motuki sa sugyot pag-amendar sa Oro Youth Code

Tukion sa Komite sa Sports and Youth Development ni Konsehal John Michael Seno, sa tigom ugma sa alas 2:00 sa hapon diha sa hawanan sa konseho, ang sugyot pag-amendar sa Oro Youth Code of 2018.

Usa sa gisugyot nga kabag-ohan mao ang pagpahigayon og mandatory ug continuing training sa tanang opisyal sa Sangguniang Kabataan ug Oro Youth Development Council. Lakip sa hisgotan sa komite ang padayong pagtuon sa paghatag og cash incentives award sa tanang kagay anong midaog sa national o international indigay sa tanang matang sa paugnat sa kusog ug ang gidusong sugyot resolosyon ni Bise Mayor Bebot Rodriguez nga magpahalipay ni Moises Lois Ilogon, Kagay-anong mananaog sa Southeast Asian Games didto sa Cambodia.

Niini, gidapit ni Seno ang mga hintungdang hepe sa pipila ka buhatan sa City Hall pagtambong sa tigom aron madungog ang ilang mga panahum, opinyon ug rekomendasyon. Gipaabot usab nga motambong sa tigom sa komite sila si Konsehal Roger Abaday, Jay Pascual, Imee Moreno, Yvy Emano, Aga Suan, Edgar Cabanlas ug James Judith II.