School buildings magamit na sa dili madugay

DUGANG kalamboan sa natad sa edukasyon ang gilantawng matagamtaman sa kabataan sa pipila ka barangay dinhi sa dakbayan sa Cagayan de Oro.

Kini human nadawat sa konseho  ubos ni Bise Mayor Bebot Rodriguez ang update report alang sa bulan sa Hunyo ning tuig gikan ni District Engineer Ana Lee Manzano sa First District Engineering Office sa Department of Public Works and Highways (DPWH).

Lakip sa maong mga proyekto nga ubos sa pundo sa DPWH, uban sa kolaborasyon sa DepEd-Basic Educational Facilities Fund mao ang pagtukod sa upat ka andanang edifisyo nga adunay walo ka lawak saringan diha sa Kauswagan Central School ug sa Lumbia National High School.  

Samtang nagpadayon usab ang pagtukod sa duha ka school building sa West City Central School ug Bulua Central School.

Subay niini, malaumon si Bise Mayor Rodriguez sa padayong pag-abag sa mga ahensya sa gobyerno dinha sa pagpatuman sa mga proyekto labina paghatag sa kahamugaway sa mga kabataan sa ilang pagtungha ug matunol ngadto kanila ang de-kalidad nga edukasyon. (RNQ/SP/Photo credits to MarketmindLocal & Lumbia NHS FB page)