Salcedo misugyot pahamtangan og multa mga water provider nga dili motuman sa tahas

GILARAW ni Konsehal Eric Salcedo, chairman sa komite sa public utilities, nga moduso og ordinansa nga magpahamtang og multa niadtong mga water service provider sa syudad nga dili motuman sa ilang tahas ngadto sa mga konsumador.

Kini human nagpadangat sa iyang special report si Konsehal Al Legaspi atol sa sesyon niadtong Lunes nga gidumala ni Bise Mayor Bebot Rodriguez mahitungod sa mga leakage sa tubo sa tubig sa Cagayan de oro Water District nga dugay nang nasinate sa katawhan sa Barangay Bulua ug nakahatag og purwesyo sa mga motorista ug mga molopyo.

Sumala ni Salcedo nga dugay na niyang namatikdan ang balik-balik nga mulo sa katawhan ug dili daling mahatagan sa tukmang solusyon hinungdan nga gisugyot niini ang pagduso og balaodnon nga magpahamtang sa tukmang multa niadtong malapason sa balaod.

Nunot niini, dapiton sa komite sa public utilities ni Konsehal Eric Salcedo ang Cagayan de Oro Water District, JE Hydro, ug uban pang mga water service provider nga nag-operate sa dakbayan aron hisgutan ug mapangitaan sa permanenteng solusyon ang maong problema. (MLR/SP)