Saktong drainage system, malungtarong solusyon sa problema sa pagbaha -Suan

MEDYO dugay na kini nga problema nga kung adunay sunod-sunod nga pagbundak sa kusog nga ulan, dili maagian sa mga motorista ang dapit sa may ubos nga junction sa fly-over diha sa Barangay Carmen, ning syudad.

Kini ang unodsa special report ni Konsehal Aga Suan atol sa sesyon niadtong Lunes nga gidumala ni Bise Mayor Bebot Rodriguez.

Matod sa konsehal nga ang junction nag konektar padulong sa Macanhan, Barangay Balulang, Zayas ug Uptown area ug grabe na ka bug-at ang dagansa traffic samot kung mag-ulan kay dugay mohubas ang tubig baha sa maong dapit.

Nagtuo si Konsehal Suan nga walay saktong drinage system ang maong lugar hinungdan sa adunay pagkahasol sa mga motorista, residente ug makaapekto sa mga establisemento sa dapit.    

Naglaum si Suan alang sa malungtaron nga solusyon aron masulbad ang problema sa pagkabara dala sa pagbaha.

Ang maong special report giduso ni Bise Mayor Bebot Rodriguez ngadto sa komite sa public works ubos ni Konsehal Al Legaspi. (RNQ/SP)