Road Safety Ordinance giaprobahan sa konseho
GILAUMAN nga maminusan ang panagbangga sa mga sakyanan ug mga disgrasya diha sa kadalanan sa dakbayan.
Kini human ang konseho, sa sesyon niadtong Lunes nga gidumala ni Bise Mayor Bebot Rodriguez, mipalabang sa ordinansa nga gitawag og “Road Safety Ordinance of Cagayan de Oro” nga nag-imposar og multa alang niadtong makalapas.
Sa maong ordinansa, gipasabot nga samtang ang kagamhanan misagop og mga ordinansa nga gidisenyo pag-promote sa road safety, giila niini ang panginahanglan nga i- improbar ang pagpatuman sa mga road safety ordinances ug pagsagop sa mga bag-ong interbensyon aron labing makunhuran ang aksidente diha sa kadalanan.
Nasayan nga ang Cagayan de Oro City Police Office - Traffic Enforcement Unit (COCPO-TEU) nakatala sa 5,882 nga road crashes sa tuig 2019, diin 1,666 ka kaso ang miresulta sa physical injuries samtang 4,167 ang miguba sa kabtangan ug 49 niini naglimbigit sa kabataan.
Ang ordinansa nga gipalabang sa konseho alang sa maong katuyoan gipaluyohan sa Komite sa Public Safety ni Konsehal Romeo Calizo ug Komite sa Pamalaod ug Reglamento ubos ni Konsehal Edgar Cabanlas.