Project ACE sa Cag de Oro gilantawng malugwayan

Gilantaw nga malugwayan pa ang pagpatuman sa Project Against Child Exploitation (ACE) dinhi sa dakbayan sa Cagayan de Oro.

Kini human ang konseho sa syudad ubos ni Bise Mayor Bebot Rodriguez gipaabot nga motuki sa rekomendasyon sa buhatan sa administrador sa pagpalabang og ordinansa nga maghatag og katungod ni Mayor Klarex Uy paglagda sa Memorandum of Agreement (MoA) tali sa World Vision Development Foundation, Inc. alang sa maong katuyuan.

Nasayran nga ang kadagkoan sa World Vision mipahibalo ngadto ni Mayor Uy nga nahatagan sila sa US Department of Labor og dugang usa ka tuig nga lugway alang sa pagpatuman sa proyekto.

Mahinumduman nga ang kagamhanan sa dakbayan pinaagi sa Ordinance No. 14107-2021 milagda og Memorandum of Agreement tali sa World Vision alang sa pagpatuman sa proyekto sa tinguha nga mapakgang ang mga kaso sa pagpang-abuso sa kabataan lakip na ang Worst Form of Child Labor (WFCL) ug Online Sexual Exploitation of Children (OSEC).

Ang proyekto gipatuman dinha sa barangay Cugman, Puntod ug Gusa isip mga pilot areas human natumbok base sa DOLE-CDO Child Labor Profiling nga daghan ang child laborers sa maong mga dapit. Ang pagpalabang og bag-ong MoA alang sa dugang usa ka tuig nga lugway dinha sa pagpatuman sa proyekto gipaabot nga konsiderahon sa komite sa social services ni Konsehal Girlie Balaba.