POW sa panubig dihas Upper Relocation Calaanan gipahikay

DAKO ang kalipay ni Konsehal Edgar Cabanlas, chairman sa Komite sa Urban and Rural Poor and Housing Development, human nadawat ang pahibalo gikan sa kadagkuan sa Cagayan de Oro Water District (COWD), nga gihikay na ang Program of Works (POW) alang sa pagkutay og linya sa panubig dinha sa Upper Relocation Site Calaanan, Barangay Canitoan.

Mahinumduman nga sa milabayng tigom sa komite, gibutyag sa mga residente ang ilang dugay nang gi-antos nga problema sa kakulangon sa panubig nga nakahatag og dakong kahasol sa ilang matag adlaw nga panginabuhi.

Niini, kinasingkasing nga nagpaabot sa iyang dakong pagpasalamat si Cabanlas sa kadagkoan sa COWD sa paghatag og daling pagtagad sa maong hangyo. Siya malaumon nga matagamtam na sa mga molopyo sa dapit ang dugay na nilang gipangandoy nga makutayan sa linya sa panubig.