top of page

PLDT, Smart miaksyon sa hangyo matukod dugang cellsites sa CDO

Paborableng giaksyonan sa PLDT ug Smart ang hangyo sa konseho sa syudad ubos ni Bise Mayor Bebot Rodriguez nga madugangan ang gitukod nga mga cell site towers o’ optical fiber broadband facilities dinhi sa dakbayan.

Sa tubag sa kompanya sa gipasakang Resolosyon No. 14327-2022 sa konseho, gibutyag nga ilang gipahigayon ang pagpatuman sa mga proyekto pagtukod og cell sites. Matod pa nga 78 na sa 80 ka mga barangay sa syudad ang naabot sa ilang 2G, 3G, 4G-LTE ug 5G technologies.

Dugang pa, nagpadayon usab ang pag-upgrade sa mga kasamtangang natukod nga cell sites aron maka-akomodar og daghan pang users ug mapalambo ang kakusgon ug user experience.

Sa natad sa fiber optic projects, ang kadagkoan sa PLDT ug Smart mibutyag nga ang PLDT aduna nay Fiber Optic Cables (FOC) ug nagpadayon usab ang Fiber to Base Transceiver Station (FTTBTS) projects dinhi sa dakbayan sa Cagayan de Oro. Lakip niini ang FOC ug FTTBTS nga CDO-Pangantucan link.

Kini nga mga proyekto ug kalihokan gilantaw nga maghatag og kaarangan sa serbisyo sa PLDT ug Smart dinhi sa syudad.

Dako ang paglaum sa kadagkoan sa kompanya nga maabagan usab sa kagamhanan sa dakbayan nga mapadali ang pagproseso sa gikinahanglang mga panugot alang sa daling pagpatuman sa mga proyekto pagtukod og cell sites. (JNortiza/SP)



Comentarios


bottom of page