Patas nga paghusay sa kaso ni Konsehal Tabac gitinguha ni Cabanlas

SA tinguha nga mahatagan og patas nga husay sa reklamo nila ni Ludivino Dayondon ug Christine Olarvida batok ni Konsehal Marlo Tabac ug Barangay Gusa Treasurer Marie Frances Abanes, ang komite sa ethics og blue ribbon ubos ni Konsehal Edgar Cabanlas mihatag sa kataposang higayon nila ni Dayondon ug Olarvida sa pagsubmite sulod sa napulo (10) ka adlaw sa ilang rason sa wala pagtunga sa gipahigayon husay bisan pa nga sila gipahibalo sa maong eskedyul.

Kon mapakyas pa sila sa pagtunga sa kataposang tigom sa umaabot Oktubre 30, ning tuig, ang komite mag-isyu og dismissal tungod sa kakuwang sa interes sa nagkiha.

Niini, naglaum si Konsehal Tabac nga mahusay ra kini ug dili na moabot sa korte ang maong butang.

Ang maong tigom gitambongan nila ni Konsehal Roger Abaday, Jing Daba, Al Legaspi, Sr., ug Aga Suan. (RNQ/SP)