Pasidungog sa mga Kagay-anong nagmalampuson sa Thailand Int’l Math Olympiad 2023 gisugyot

Gisugyot ni Bise Mayor Bebot Rodriguez ang paghatag og pasidungog ug pahalipay sa onse ka mga Kagay-anong tinun-an nga nagmalampuson sa gipahigayong Thailand International Mathematical Olympiad 2023 sa pagdala og dakong garbo ug dungog dili lang sa dakbayansa Cagayan de Oro kun dili sa tibouk nasud sa Pilipinas.

Sa sugyot resolosyon nga giduso sa bise mayor, gibutyag nga ang maong kompetisyon gipasiugdahan sa Olympiad Champion Education Center sa Hongkong nga naghatag og kahigayonan sa mga tinun-an gikan sa lain laing nasud sa kalibotan.

Niini, onse ka mga tinun-an sa dakbayan ang nakaangkon og medalya gumikan sa ilang nahimong kalampusan. Kini naglakip nila ni Shadi Kent Al Hamoud (Corpus Christi School) nga nakakuha og gold medal – secondary 3 category; Denn Ethan Josh A. Castro (St. Mary’s School), silver medal – primary 6 category; Ethan Bryan See (Oro Christian Grace School), silver – primary 6 category; Samantha Kaye Asuncion (Oro Christian Grace School), silver – primary 6 category; Marie Nicole Andres Viñas (Xavier University SHS), silver – Senior Secondary category; Johnny Cape Nale (City Central School), bronze – primary 1 category; Enzo Bryan See (Oro Christian Grace School), bronze – primary 1 category; Leinel Cassidy Chua (Oro Christian Grace School), bronze – primary 4 category; Rafael Ethan Joseph Abas (St. Mary’s School), bronze – primary 6 category; Katriona Mischka Dablio (Oro Christian Grace School), bronze – secondary 1 category ug Samuel James Beja (Oro Christian Grace School), Merit Award – primary 6 category.

Ang kalampusan niining mga tinun-ang Kagay-anon sa international competition nagsilbing inspirasyon sa kabataan ug mga Kagay-anong tinun-an aron maninguha nga mapalambo pa ang ilang kakayahan ug kahanas sa pagsalmot sa mga indigay sa world stage, pamahayag ni Bise Mayor Bebot Rodriguez.