Pagtukod sa culture and arts council suportado ni Konsehal Cabaring

HUGOT nga gipadayag ni Konsehal Roberto Cabaring, chairman sa komite sa cultural affairs sa konseho, ang iyang suporta sa sugyot ordinansa  nga mag-establisar sa Culture and Arts Council sa Cagayan de Oro nga giduso nila Bise Mayor Bebot Rodriguez ug Konsehal Maximo Rodriguez III, nga nagtumong sa pagpreserba ug pagpalambo sa kultura sa dakbayan.

Sa gipahigayong tigom sa komite nga gidumala ni Konsehal Gerlie Balaba, kinsa co-author usab sa maong ordinansa, gibutyag ni Cabaring nga maayo ug kompleto ang maong ordinansa.

Matod niya, dako ang iyang pagdayeg niini tungod kay ipakita sa maong program ang kasaysayan sa Cagayan de Oro nga nagsugod mismo sa mga lumad sa syudad.

Gipasabot sa konsehal nga dako ang kalambigitan sa culture and arts sa pagpalihok niini aron masumpay ang karaan nga tradisyon ug ang mga binag-o nga paagi.

Dugang pa ni Cabaring, nadasig siya sa milabayng Higalaay Festival diin gipahigayon ang "sinampat" nga giapilan sa taga-Bukidnon ug ubang   mga dapit nga nakapukaw sa kanhiay nga kaugalingnan ug pagkatawo sa dakbayan.

Tungod niini, andam ang konsehal nga mamahimong kabahin sa maong lakang aron magmalamposon ang lakang ug mapakita ang saktong hulagway sa kultura sa unang panahon. (JRG/SP)