Pagmugna sa Eng’g, Infra Mgmt Board tun-an sa Komite sa Pamalaod

TUN-AN sa Komite sa Pamalaod ni Konsehal Edgar Cabanlas ang sugyot pagmugna sa Engineering and Infrastructure Management Board (EIMB).

Kini human si Konsehal Cabanlas, sa sesyon sa Konseho niadtong Lunes nga gidumala ni Bise Mayor Bebot Rodriguez, mipasabot nga gikinahanglan pa ang dugang pagtuon sa maong sugyot ug ang rekomendasyon sa mayor aron matino nga dili magdoble ang mga tahas ug kaakuhan. Ang sugyot ordinansa nga gipangamahanan ni Konsehal John Michael Seno naglatid sa komposisyon ug mga tahas sa hunta.

Lakip niini ang pagsuta sa program of works sa mga proyekto sa imprastraktura dala ang pagkonsidera sa gidugayon sa pagtrabaho sa proyekto, road right-of-way, pagkabalda sa dagan sa trapiko, kapaseguroan sa mga trabahante, motorista, lumalabay ug mga maapektohang establisamento. Ang EIMB gitahasan usab nga makigtambayayong tali sa lain-laing ahensya sa gobyerno ug kapunungan alang sa hingpit nga pagpatuman sa proyekto.

Sa maong sugyot ang EIMB langkoban sa mayor isip chairperson, chairman sa Komite sa Public Works sa konseho isip vice chairperson, uban sa city engineer, city information officer, city building official, city planning and development coordinator, hepe sa Roads and Traffic Administration (RTA), City Public Services Office, City Disaster Risk Reduction and Management Office (CDRRMO), ug City Housing and Urban Development Department (CHUDD), DPWH-10 regional director, district engineer sa CDO First ug Second District Engineering Offices, representante sa Liga ng mga Barangay, CEPALCO, MORESCO-1, COWD, ug National Telecommunications Commission (NTC) isip mga sakop.

Gilauman nga pinaagi sa EIMB mapalambo ang koordinasyon tali sa gobyerno ug pribadong mga kontraktor sa lain-laing proyekto sa imprastraktura sa dakbayan aron malikayan ang kapiot nga dagan sa trapiko, pagbaha ug aksidente sa kadalanan.