top of page

Paglukat sa bldg permit gitinguhang mapasayon

Magpadayon ang pagtuon sa komite sa public works ni Konsehal John Michael Seno sa sugyot ordinansa nga mag-amendar sa streamlined guidelines dinha sa pag-isyu og building permit sa lokal nga kagamhanan.

Sa tigom sa komite niadtong Martes, gipaabot sa mga pribadong enhenyero ang ilang panahom kalabot sa ilang kasinatian diha sa paglukat og building permit sa Office of the Building Official (OBO) nga matod pa adunay kalangan sa proseso.

Si Glenn Banez, special assistant for revenue operations sa buhatan sa Mayor, mibutyag nga buot sa mayor nga mapadali ang proseso sa pag-isyu sa building permits nga dili usab makompromiso ang kapaseguroan ug kaluwasan sa mga edipisyong matukod sa syudad.

Hinuon, si Engr. Joel Momongan, officer in charge sa OBO, mibutyag nga aduna nay kausaban nga gipatuman sa ilang buhatan diha sa pagdawat sa mga aplikasyon ug padayon kining hatagan sa pagtagad.

Iyang gidugang nga kun mahuman ang pag-evaluate sa mga gisumeteng plano ug makita nga kompleto ug insakto ang nahilatid sa plano mahimo na kining maisyohan sa permit.

Niini, giduso ni Seno ang maong ordinansa ngadto sa Technical Working Group (TWG) alang sa dugang nga pagtuon ug rekomendasyon.



bottom of page