Paghinlo sa mga canal sa Barangay 3 suportado sa Konseho

GILANTAW nga makunhoran na ang problema sa pagbaha diha sa Barangay 3 ning dakbayan.

Kini human ang Konseho sa sesyon kagahapon nga gidumala ni Bise Mayor Bebot Rodriguez hiniusang misagop og resolusyon nga nag-uli sa ordinansa sa maong barangay nga may kalabutan sa ilang 2025 Annual Budget nga adunay gibanabanang kinitaan ug galastohon  nga mokabat sa P3,819,577.

Tipik sa  gipundohan sa barangay ang 20 porsyentong development fund aron gamiton sa paghinlo sa mga kanal sa tibook barangay aron makunhoran ang mga pagbaha.

Samtang sa laing bahin, migahin usab ang barangay og igong pundo alang sa pagpatuman sa youth development program sa Sangguniang Kabataan, 5 porsyentong pundo alang sa Barangay Disaster Risk Reduction Management Fund ug uban pa.

Ang resolusyon nga gipalabang sa Konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Edgar Cabanlas. (JRG/SP)