top of page

Paghimo’g Book of Codes sa CDO gilaraw




Gitinguha karon ni Konsehal Ian Mark Nacaya nga mapasayon ang pagpangita sa mga balaod nga napalabang sa konseho.

Kini human ang konsehal sa sesyon sa Konseho niadtong Lunes nga gidumala ni Bise Mayor Bebot Rodriguez, misugyot sa pagpahigayon og codification sa mga balaod nga napalabang na ug paghan-ay sa dugang pang mga balaodnon aron sayon nga makit-an sa katawhan.

Iyang gipasabot nga niadto pang tuig 1994 gipahigayon ang codification sa mga ordinansa sa syudad nga gitawag og Cagayan de Oro City Codified Ordinance of 1994.

Gani, aduna nay mga pasiunang lakang nga gihimo sa milabayng konseho ug angayan na lang kining padayonon aron kun adunay mangita dali na kining mahatag, sumpay ni Nacaya.

Niini, siya misugyot sa pagtapok sa mga balaod basi sa klasipikasyon sama sa pag-usa sa tanang regulatory ordinance, social development, senior citizens ug youth, panglawas, barangay governance, peace and security ug uban pang klasipikasyon.

Atong i-codify matag klasipikasyon ug ang akong panawagan nga abagan ako sa mga kauban sa konseho aron mahan-ay ang tanan ug mapalabang ang gikinahanglang balaod alang niini ning panahon sa 20th City Council, dugang sa konsehal.

Nunot niini, gitahasan ang komite sa pamalaod ni Konsehal Nacaya aron paghimo sa gikinahanglang mga lakang nga mamugna ang libro sa mga ordinansa sa syudad basis a klasipikasyon.

Ang maong sugyot gidayeg ni Bise Mayor Bebot tungod kay dako kining tabang sa katawhan ilabina sa mga anaa sa academe nga maghimo og research kabahin sa dakbayan sa Cagayan de Oro.

Ako malaumon nga matuman kini nga proyekto sa labing daling panahon, pamahayag ni Bise Mayor Bebot Rodriguez.

bottom of page