Paghikling sa demolisyon dihas Bayabas gihangyo sa Konseho

SA ilang sesyon niadtong Lunes nga gidumala ni Bise Mayor Bebot Rodriguez, hiniusang gipalabang sa Konseho sa dakbayan ang resolusyon nga naghangyo ni Presiding Judge Ana Candida N. Casiño sa Branch 17, Regional Trial Court sa Misamis Oriental, nga ipailawom sa temporaryong pagpahunong sulod sa unom (6) ka bulan ang pagpatuman sa Writ of Demolition diha sa Bayabas ning syudad.

Kini may kalabotan sa Civil Case No. 90-520, “Ayala Corporation, plaintiff, versus Heirs of Romeo Villanueva, Heirs of Rustom Lago ug Heirs of Henry Salvador”, nga naglambigit sa usa ka luna nga nahimutang diha sa Barangay Bayabas.

Sa nadawat nga notice of writ of demolition nga giisyu sa Regional Trial Court of Misamis Oriental Branch 17, nasayran nga ang pagpatuman sa demolisyon gitakda sa Hulyo 30, ning tuig.

Atol sa miaging tigom sa komite sa urban ug rural poor ubos ni Konsehal Al Legaspi, Sr., ang komite nagkauyon sa paghangyo sa korte nga ihikling una ang demolisyon ug kusganong mihangyo sa City Housing and Urban Development Department sa pagpahigayon og socio-economic survey sa mga apektadong pamilya alang sa pagpangandam sa ilang posibleng relokasyon.

Gilauman ni Konsehal Legaspi nga unta paminawon sa korte ang ilang hangyo. (RNQ/SP)