Paghatag sa dugang insentibo ni Paalam gihisgutan sa komite ni Seno

PADAYONG gitun-an ang sugyot paghatag og dugang benepisyo o “special award” alang ni Carlo Paalam kinsa nahimong silver medalist sa dulang boxing sa bag-ohay lamang nga Olympic Games sa Tokyo, Japan.

Sa tigom sa komite sa Sports and Youth Development ni Konsehal John Michael Seno sa miaging adlaw, si Konsehal Roger Abaday mihangyo nga gawas sa P2 milyones cash incentives nga ihatag sa kagamhanan ngadto kaniya gisugyot sa konsehal dugangan pa ang maong insentibo.

Matod sa konsehal nga segun sa Akta Republika 10699 kon “National Athletes and Coaches Benefits and Incentives Act” prayoridad niini ang National Housing Programs nga nagtanyag sa baratong “Pabahay” Loans ug uban pang oportunidad nga gitanyag sa National Housing Authority o sa Home Development Mutual Fund (HDMF).

Gipasabot ni Abaday nga kung ang pribadong entidad makahatag og house and lot ni Paalam mas labaw’ng makahatag ang kagamhanan isip special award lakip na kang Coach Elmer Pamisa.

Si Konsehal Seno malaomon nga pinaagi sa maong dugang benepisyo, hayan maaghat si Paalam ug ubang mga atleta sa syudad nga maningkamot nga makadala og garbo dili lang sa syudad kun dili sa tibook nasud.

Niini ang maong sugyot giduso ni konsehal Seno ngadto sa komite sa Sports alang sa dugang pagtu-on ug rekomendasyon.