Paghatag og ayudang pinansyal sa mga first time jobseekers gisugyot

GIPAABOT konsiderahon sa komite sa labor and employment ni Konsehal Girlie Balaba ang sugyot nga mahatagan og ayudang pinansyal ang mga nangita og trabaho sa unang higayon.

Kini human giduso ni Konsehal Bernie Esparcia ang sugyot ordinansa sa tinguha nga maabagan ang katawhan ug mahatagan sa patas nga kahigayonan sa ilang pagpangita og trabaho.

Sa maong sugyot, ang dakbayan motunol og voucher balor P1 ka libo ngadto sa mga kabus nga mogradwar sa mga kolehiyo ug unibersidad dinhi sa syudad nga makuha dinha sa Public Employment Services Office (PESO).

Ang maong kantidad magamit dinha sa paglukat sa mga gikinahanglang dokumento ug rekisitos sa pagpangempleyo sama sa barangay clearance, transcript of records, medical certificate ug laboratory exams.

Dugang pa, ang maong voucher kausa lang mahimong makuha sulod sa usa ka tuig gikan sa pag-avail sa pribilihiyo nga gisangon sa Republic Act 11261. (SP/JNortiza)